Vos paramètres de cookies actuels empêchent l'affichage de contenu émanant de Youtube. Cliquez sur “Accepter et afficher le contenu” pour afficher ce contenu et accepter la politique d'utilisation des cookies de Youtube. Consultez la Politique de confidentialité de Youtube pour plus d'informations. Vous pouvez retirer votre consentement à tout moment dans vos paramètres des cookies.
Noèl sus la neishenca de noste joena Republica
Air : Do do l’enfant do, l’enfant dormira bientôt
L’aut’còp, la França shens pairin,
Gojata hèita i tot’armada,
La Republica qu’aborrí ;
Ger qu’acochà d’ua mainada,
Qui n’ei ni piga ni ausèth ;
França, perqué non la’ns’hasetz.
Chut, chut, pòples, chut,
Diu quin plora la mainada,
Chut, chut, pòples, chut,
Chut, amics, non hem pas brut !
Malgré sons glapits i sons plors,
Sons pairins que l’an bajolada
De bajòus de totas colors ;
Diu ! be la vòlen pigalhada,
Quant de cocardas, de ribans,
Sustot de verds, negres i blancs !
Chut, chut, pòples, chut,
Qu’ei drin parda la mainada !
Chut, chut, pòples, chut,
Chut, amics, non hem pas brut !
Deu bonet de la libertat
L’ainada que vadó coifada ;
A la capdeta que’u s’escad,
Que d’un beguin l’an atifada ;
La França hèita i au tuton
Qu’apopèra son Auferton.
Chut, chut, pòples, chut,
Leishem popar la mainada ;
Chut, chut, pòples, chut,
Chut, amics, non hem pas brut !
Màgers i reis ge son absents
Deu brèç on la dròlla ei jumpada ;
Au lòc d’òr, de mirra, d’encens,
Que la’n passerén per l’espada ;
Com Erodes, au lòc de presents,
Que dan la mort aus innocents !
Chut, chut, pòples, chut,
Leishem cachar la mainada,
Chut, chut, pòples, chut,
Chut, amics, non hem pas brut !
Totun, qu’èi paur dab Lustucrú,
Dab broishas i contes de hada,
Dab Barba-Cuja i Barba-Blu,
Peus pairins que sia alolada !
G’ei vertat que son coneguts
Tots los reis per estar becuts !
Chut, chut, pòples, chut,
Qu’espaurucan la mainada,
Chut, chut, pòples, chut,
Chut, amics, non hem pas brut !
Quant de sents Jusèps tà’ns’jurar,
Qu’autan grana que son ainada,
La capdeta que vaderà.
Per taus neurissèrs aninada !
B’a gran besonh de s’estirar,
Puishqu’Diu sap quant nse’n costerà !
Chut, chut, pòples, chut,
Leishem neurir la mainada !
Chut, chut, pòples, chut,
Chut, amics, non hem pas brut !
Quan ei qui sola marcherà ;
Quan ei qui serà desvesada ;
Qui herà dents, qui parlerà,
Peus pairins shens estar bohada !
Que crei qu’au lòc de’u dar bon let,
Perdiu, que’u copan lo siulet.
Chut, chut, pòples, chut,
Quan parlerà la mainada ?
Chut, chut, pòples, chut,
Chut, amics, non hem pas brut !
Units per la fraternitat,
En aténdent qui’u dem l’aubada,
Pòples, i que la libertat,
Per era, amics, sia sauvada ;
Au capceron que deu caupir
Longtemps la china i har pipí !
Chut, chut, pòples, chut,
Leishem pishar la mainada !
Chut, chut, pòples, chut,
Chut, amics, non hem pas brut !